سۆران کوردستانی:ئەم ژیانە ژینەژانە

 ئەم ژیانە ژینەژانە

ژین چیە؟ دەردێ گرانە

هەرکەسێ لەم خاکدانە لەم تراویلکەی جیهانە

دەسپڕه‌ یا دڵپڕه‌

گیرۆدەیی بادی خەزانە

هەر ڕووەو  مەرگ و نەمانە ..

ئەم ژیانە ژینەژانە

ژین چیە؟ ژەنگاری گیانە

سەد هەزاران تاسەیە

وەسڵێک و سەد جار دووری‌یە

یەک خەندە و سەد چاوی گریانە

شەرحی دەردی ئیشتیاقە

یان حەدیسی دەردی هیجرانە

ئەم ژیانە ژینەژانە

ژین چیە؟ ئازاری گیانە

تینگیی مەغز و رەگ و پۆس

گۆمی قووڵ و مەندی ئاواتە

خەوی ئاڵۆزی ئینسانە ..

ئەم ژیانە ژینەژانە

ژین چیە؟ سوێراوی حەسرەت

زایەڵەی ناکامی و تاڵاوی مەینەت

دڵسووتانە

گرَگرَانی ئاگری گرَکانی گیانە ..

ئەم ژیانە ژینەژانە

ژین چیە؟ زیندانی گیانە

گەردشی پەرَگاری گەردوون

سوورَی گۆچانی ستەمکار

کایەیی بەخت و هەل و زێرَ

کەڵکەڵەی مێشکی هەوایی

ئێش و ئەشکەنجەی رەوانە

دەردی دڵ بۆیە گرانە ..

ئەم ژیانە ژینەژانە

ژین چیە؟ شانۆی خەمانە

تفڵ و گەنج و پیر هەر یەک

بەستەیی چەرخی زەمانە

کامەرانی و نەشئەیی دنیای زێرَ و زۆر دوو رۆژە

چەند بمێینێ چۆن بسوورَێ

یەک بەهار و یەک خەزانە ..

 ئەم ژیانە ژینەژانە

لادە سۆران لەم جیهانە

هەر رووەو ئاسۆیی عیشق برَوانە

هەستە !

هەڵدە ئەم پەردەرَشەی خومخانەیی زیندانی گیانە

بادەکەی رووناکی عیشقە ئاوی سەرچاوەی ژیانە ..